तुझे नि माझं नातं "अनामिकच"

नातं... आपल्या संपूर्ण आयुष्यात कितीतरी नाती आपण बघतो , लहानपणापासून निर्माण होणारी रक्ताची नाती... शाळेत असताना आणि त्या वयात जुळणारी मैत्रीची नाती... नकळत्या वयात हळूवार फुलणारी प्रेमाची नाती... विश्वासाची, राग-लोभाची, हेव्याची, प्रेमाची... अशी कितीतरी नाती आपल्याही नकळत निर्माण झालेली पण तरीही काही नाती, काही बंध असे असतात की त्यांना कोणते नाव द्यावं हेच उमगत नाही, आणि मग प्रश्न पडतो, ' तुझं नि माझं नातं आहे तरी काय...??

तुझ्यात आणि माझ्यात असंच नातं आहे... काहीसं अनामिक!! सर्व नात्याहून वेगळं आहे ते, थोडंसं खास आहे... प्रेम, विश्वास, आदर या सगळ्यातून फुलून आलेलं आपलं हे नातं नक्कीच त्याचं वेगळेपण जाणवून देतंय... आपण एकत्र घालवलेले क्षण तसे अगदी मोजकेच आहेत, आयस्क्रीम आवडंत म्हणून प्रत्येक भेटीत तू ते घेतोस आणि म्हणतोस आता या नतंर नाही हा खाणार मी!!! पण पुढच्या वेळीही आयस्क्रीमची आठवण तुच करतोस, फार हसू येते तुझ्या या बालिशपणावर... सहज गप्पा मारत आपण फिरतो किंवा नुसते भटकत चालत घालवलेले क्षण असतील पण तरीही त्यातून मनात आनंद निर्माण करणारं, मनात तरतरी निर्माण करणारं काहीतरी असतं हे नक्की...

आपण आठडयातून एकदाच ,कधी कधी तर महिन्याने भेटतो , पण आठवडाभर बोललो नाही, तर मग मनात हुरहूर लागून राहते? कुठेतरी मनात तुझ्या आठवणीनी जागं का व्हावं... तुझ्याशी बोलताना, तुझ्या सोबत असताना मन अगदीच प्रसन्न का असावं... काय आहे रे आपल्यात नातं...

तुझ्या दृष्टीने आपल्या नात्याला काही नाव नाही , असं असलं तरी ही , मैत्रीपेक्षा ते जास्त आणि खास आहे माझ्यासाठी.... मैत्रीपेक्षाही सुंदर, मनापेक्षाही चंचल, नाजूक असलेलं नातं .....कुठले हे नातं? काय नाव त्याचं?
तुला भेटण्याची, तुझ्याशी खूप काही बोलण्याची, तुझ्यासोबतचा सहवास एनजॉय करण्याची ओढ मी कितीही नाही म्हणाले तरी जाणवतेच ...मला वाटतं तु फोन करशील आज,आत्ता आणि त्याचं क्षणी तुझा फोन येतो. माझ्या आवाजात जाणवणारा आनंद तुला सगळं काही नेहमीच सांगून जातो... माझ्या मनातलं तु जाणू शकला याचा आनंद मलाही होतो !!! असं समाधान फक्त तुझ्याशी संवाद साधतानाच का होतं? असा आनंद फक्त तुझ्यासोबत असताना का होतो? तुझ्याशी बोलताना नेहमी माझे बोल हे बोबडे होऊन जातात असं इतर कोणासोबत बोलताना कधीच होत नाही, तुझ्याशीच बोलताना का होतो? हा खरं तर माझ्या मनाल पडलेला सगळ्यात मोठ्ठा अनुत्तरीत प्रश्न ....... अरे, तुझं नि माझं नातं काय...सांग ना?

वेळेचं भान होऊ न देणारं तुझं बोलनं, तुझ्या आयुष्यात येणाऱ्या मुली, तुझं घर-घरातली सगळी मंडळी मग ती तुमच्या अगदी आई-बाबा, बहिण, दादा-वहिनी पासून ते तुझ्या शर्ली पर्यत सगळेच किती तुझ्या जवळ आहेत हे सांगणारं तुझं बोलणं, ऑफिसमध्ये केलेली मित्रांशी मस्ती-भांडण. इतकच काय तु घरी आज जेवण काय बनवलेस हे ही सांगायला तु दमत नाहीस. सतत काही ना काही बोलतच असतोस. मध्येच जर तुला "मी" आठवले तर तुझं एकच वाक्य असतं ’तु अभी बच्ची है’ ‘तु कब बडी होगी’ राग तर फार येतो या शब्दांचा पण तुझ्या बोलण्याचा नाही येत. मग मीही तुला म्हणतेच ’कसा आहेस रे तु? वेडा!’ "भगवान ने तुम्हे कितने फुरसत मै और कैसे बनाया है" खरं तर मला म्हणायचं असतं की ‘हे भगवान फुरसत मै बनाया लेकीन गलत बनाया है इसे आप अच्छा दिल देना ही भुल गये जो किसी और के लिये धडके’ या माझ्या बोलण्यावरही तुला हसूच येतं. मी कार्टुन म्हटल्यावर "चूप रे" किंवा कधी कधी "Shut up" म्हणतोस ना खरंच एकदम सॉलिड वाटते एकायला, एकच तर शब्द आहे माझ्याकडे तुला पिडायला, पण खरंच तु कार्टुन आहे हा! स्वतः फार खडूस आहेस असं नेहमीच दाखवतोस. पण तसा तु नाही आहेस हे मलाही माहीत आहे आणि तुलाही...तुझ्याकडे कोणासाठीही वेळ नसतो फक्त कामात मग्न असतोस...असं असलं तरी हे फक्त बहाने आहेत तुझे लोकांना टाळण्याचे...आवड असली की सवड ही मिळतेच रे...!!! पण वेळ नसण्याचे बहाने मला कधी सांगत नाहीस हे माझे नशीब...

असो... वेळात वेळ काढून तुझ्या आठवणी जाग्या करायला लावणारं तुझं बोलणं. प्रत्येकवेळी घडोघडी तुला स्मरणार, तुला आठवणारं, तुला मिस करणारं, तुझ्या छोट्याश्या मेसेज ची आतुरतेनं वाट बघणारं, कुठलं हे नातं? काय नाव आहे या नात्याचं?

मनात आलं की सारं काही बोलून दाखवणारं माझं मन... मनात न ठेवता बिनधास्त खोलून सांगणारं, तरीही अबोल असणारं माझं मन... मनातल्या मनात तुझ्यासोबत आयुष्य जगणार माझं मन... मनातल्या मनात गोड स्वप्नं रंगवणारही माझं मन....प्रत्येक क्षणी तुझं हात हातात धरण्याची इच्छा ठेवणार माझं मन... तुला आनंदी बघतच आनंदी होणारं, तुला दुःखी बघताच दुःखी होणारं माझं मन... आहे का रे तुझं आणि माझं काही नातं?

मला माहित नाही तुला माझं मन कधी समजणार आहे की नाही पण मी तुझ्याकडून अशी अपेक्षाही करत नाही कारण, असंही म्हणतातच ना....नातं निरपेक्ष असेल तर ते जास्त टिकतं! मला फक्त हवं आहे असंच आपलं निरपेक्ष "अनामिक" नातं !!!